فواصل دروشة

يا بياعين السر فى الصاغه
أنا قلبى غيط ياسمين وغيط نعناع
وإن قستوا روحى بروحكم الباغه
هطلع ملك وهتطلعوا الأتباع
*******
"يارب "
.......
يا مصيّر الملكوت بلا جواسيس
علّم ملوك الأرض معنى العدل
عمر الجبل ما هيتعدل لخسيس
ولا عمر جنّه هتتفتح للندل
-------
يا موقّّف السماوات بلا عمدان
شمّم ملوك الأرض ريحة الموت
يمكن يحسّوا إن الأجل قد حان
فيوزّعم على شعبهم بسكوت
--------
يا مدّى أمرك للقمر ينشقّ
عمّم ملوك الأرض بالطّيبه
ورّى الملوك إزاى يكون الحق
وإزاى بليت الناس دى بمصيبه
-------
يارب رحمه وصبر ع الابتلا
إنت اللى قادر وإنت سيّدنا
وإنت اللى واقفين فى بابك نطلب المسأله
وقلوبنا مطّمنه بإنك هتسندنا