غناوى الدرويش

يا معلّقه القلب الماديليا " ف" شنطتك يا دايسه فوق روحى القزاز يا راضعه حلمك من بزاز صدر الشقا ما تكلفتيش الروح فى عب الشرنقه وما تسقنيش الحلم من غير معلقه وما تاخدنيش من إيدى يم المشنقه وتتهجى ويايا البيوت أنا صوت آمون اللى اتنفض ورفض خيطان العنكبوت وأنا أعلى من صدر التابوت اللى انكسر وأنا أى حد هينتصر على شهوة الخيل الجموح وأنا فرحة القمر اللى سهران ع السطوح يا أم الضفاير أعلى من شجر الطموح المنتهك وسط الخضار يا بدر سهران ع السكك مين يشبهك فى الاحتضار يا عيدان لمون مستسلمه ودبلانه فى الأرض البوار يا عيون بتعشق لنتحار فى قزايز الليل الغويط يا شمس خافت تتفرد على أى غيط يا قلب مصنوع من عجينة البسكويت ما تحطنيش على سكّة الوجع العبيط وتبصّ لى أنا مش ولى ومانتاش مسيح ما تحطنيش قدام ضريح التوت وتخبط ع الوتر وتدوس على الصدر الصفيح يا قلوب بتفتح صدرها لأيتها ريح أنا مش جريح الورد وكيزان الدره يا حضن أوسع من حيطان المندره أنا مش أسير القاهره ومدّاح "كافور " يا كلمه واقفه لطلقة الشاعر على كفوف الطي

ما تصدقنيش أنا مش درويش بيحب الناى والضلّيله ولا مارد ماسك كيله وداير أكيّل همّ الناس ولا حارس واقف يحرس راس سيدنا الوالى ولا كلب بينبح من غير صوت جوّا بلاط الباب العالى ولا نفسى أهتف تحت رايات الوطن الغالى بأيتها كلام ولا عايز أقول لك كنت إزاى وأنا قاعد أتابع ع الشاشه استشهاد صدّام وعيون مفتوحه وخلق نيام والعالم داير ينزف سم وأنا ماشى معايا يدوب الستر وحبّة دم ودعوة أم وكلمه ف كُمّ قميص دبَلان ما تصدقنيش لو حسيتى إن أنا مش سلطان لو قلبك حس إن أنا دبلان زى الصفصاف لو قلبك حس إن أنا خوّاف … ما تصدقنيش وما ترسمنيش على قلبك تانى وتتباهى وما تسرقنيش من توّاهى ف أرض النسيان و ما تنخدعيش فى كلامى المبدور فى الجورنان وتعاتبينى أنا عمرى ما كنت علم مفرود على جتّة طفل فلسطينى ولا كنت المنديل المليان بدموع الفرح الحطّينى ولا كنت السحبة اللى هتحذق وتفضّى الفرح الياسمينى على حدود بغداد ما تصدقنيش لو كل ولاد الحاره اتلمّوا وهتفوا بروح وبدن عوّاد عوّاد باع أرضه وسابها وهجّ والكل احتجّ والكون اترجّ عشان عوّاد