غناوى الدرويش

وحشتينى وليل الغربة لمّا ياخدنى من حضنك بيعمينى وبيخلينى مش حاسس بطعم الضىّ وبيخلينى مش حاسس بإن العالم الموبوء فى ليل الغربة كائن حىّ وبيخلينى مش حاسس بعضمى النىّ ساعة الضيق ومش حاسس بطعم الخوف وريحة الشىّ فى الأبريق ومش حاسس بإن الميّة فى غيابك يبلّ الريق ومش حاسس بإنى غريق فى بحر التوهه والضلمه ومش راكب حصان الريح عشان أخطف لك الكلمة من النجمات ومش شايفك فى غيط الورد بفيونكات ومش مفرود على عضامك ومش دايب على الكنبات ومش حاسس فى ساعة الثورة والغليان بريحتك تحت راية الجات وحشتينى يا أحلى بنات بلاد النور يا فرحة بتجرى وسط الدور يا عود بنور بيخطفى من اللبلاب بحس معاكى إن الحلم من غير ناب وإن الضحكة مش لازم تكون بحساب وإن الدنيا قاعة كبيرة من غير باب وإن الأرض مش أطلس ومش قارات ومش حبّة حاجات فى كتاب وإن الجنة مش محتاجة منّى ألبس لها قبقاب وإن عنيكى وحشانى بأسباب أو بدون أسباب يا عود بنور فى غيط عناب يا أصغر قلب فى الكتّاب بيرسمنى بيقسمنى لتلات تنصاص وبيمشّينى من غير قلب ع السكة ومن غير راس ومن غي

بيّاع الورد على ناصية شارع قلبك عمّال بيدلل بالعناقيد وغيطان روحك ما بقتش بتطرح ورد جديد زى الأوّل وشعاع الضىّ اللى ف صدرك مش نفس شعاع الضى اللى ف صدرك من عمنوّل وأنا مش مجنون علشان أتسوّل من كف أبالسة قلبك لحظة نور علشان أتحوّل لوابور جاز أو كلب بيضحك على برواز مش متعلّق أو قطّ مبلّق داير يرمح بين دهاليز الصدر البور أو طيرة بتهتف وسط طيور قصر الحاكم أنا مش مجنون علشان أتحوّل لملاكم همجى وسفاح أنا مش مجنون علشان أتحوّل وياكى لقبّاض أرواح

ما حلمتش لسّه تكون أنتيكة ف وسط الخلق ؟ وتدوس ع الأرض بكل قواك ؟ وتحارب نفسك من جواك وتحط ايديك فوق صدر ملاك النور وتتوه ؟ ما حلمتش مرّه تكون تاتّوه فى ايدين البنت أم ضفيرتين ؟ ولا علبة تين على رف البياع الخايب ؟ ولا عروه ف أى قميص دايب ؟ ولا ورده ف ايد عيّل جايب فى ايديه الضىّ ؟ ما حلمتش مره تكون راكيه لكباية شىّ ؟ ولا واحد ماشى بيهتف (( حىّ )) ف وسط الناس ؟ ما حلمتش مرّه تكون كراس من غير جلاد ما حلمتش مره تكون كرباج فى ايدين جلاد ابن لذينه ؟ ما حلمتش تبقى سرينة خوف ؟ ما حلمتش مره تشوف الأرض بتحذق جامد لجل ما تولد واد حلّوف ؟ ما حلمتش ترسم حبّة صوف على كوز اللوف وتقول ,, تجريد ,, ؟ ما حلمتش تطلع من جلدك قبل المواعيد ؟ ما حلمتش تبقى جريد بيغازل وش الباب ؟ ما حلمتش تبدر أوجاعك وسط اللبلاب ؟ احلم دلوقت بكل قواك احلم واياك تطلع قبقاب

الليل سكوت والجو هس والكلمة ايد بتجسّ بيض العنكبوت والضحكة خايفة تكون بصوت لأحسن تموت والأرض لابسة عنيها وبتقرا الكلام / الطهر فوق صدر التابوت من غير وضو والخوف عدو وشايل سلاح وأنا وإنتى كتلة حب ماشيين تحت راية لنفتاح والدنيا شبر براح مبعتر فى المدى والكون بينزف من جميع الأوردة ف كرابيج كلام وأنا ماشى جنبك بسألك مين فينا هيكون الإمام ؟ مين فينا هيقوم للطواف جوّا المقام مين فينا هيرد السلام ع الأوليا ؟ مين فينا هيقول للكلاب إن إنتو ما نتوش أنبيا وما حناش عبيد ؟ مين فينا هيحاول يهيئ نفسه للزمن الجديد من غير رتوش ؟ الليل سكوت والجو مليان بالهاموش والأتربة والأرض داخلة السوق تتاجر بالربا والخوف ايدين متسرسبة بتضغط على الصدر الجبان وأنا وإنتى كتلة حب ما شيين تحت راية لنفتاح من غير ودان أنا وإنتى كتلة حب كارهين صولجان المهزلة أنا وإنتى خضنا الحرب وسط البهدلة ولا خفنا من ساعة الوجع ولا من ساعات الزلزلة ولا رجعتنا الأسئلة المستسهلة العيشة الحرام أنا وإنتى كتلة حب غاويين لنتقام وسلام على البدن السلام المستكين أنا وإنتى م