جوز عصافير
الليل سكوت
والجو هس
والكلمة ايد بتجسّ بيض العنكبوت
والضحكة خايفة تكون بصوت
لأحسن تموت
والأرض لابسة عنيها وبتقرا الكلام / الطهر
فوق صدر التابوت من غير وضو
والخوف عدو وشايل سلاح
وأنا وإنتى كتلة حب
ماشيين تحت راية لنفتاح
والدنيا شبر براح مبعتر فى المدى
والكون بينزف من جميع الأوردة
ف كرابيج كلام
وأنا ماشى جنبك بسألك
مين فينا هيكون الإمام ؟
مين فينا هيقوم للطواف جوّا المقام
مين فينا هيرد السلام ع الأوليا ؟
مين فينا هيقول للكلاب
إن إنتو ما نتوش أنبيا وما حناش عبيد ؟
مين فينا هيحاول
يهيئ نفسه للزمن الجديد من غير رتوش ؟
الليل سكوت
والجو مليان بالهاموش والأتربة
والأرض داخلة السوق تتاجر بالربا
والخوف ايدين متسرسبة
بتضغط على الصدر الجبان
وأنا وإنتى كتلة حب
ما شيين تحت راية لنفتاح من غير ودان
أنا وإنتى كتلة حب كارهين صولجان المهزلة
أنا وإنتى خضنا الحرب وسط البهدلة
ولا خفنا من ساعة الوجع
ولا من ساعات الزلزلة
ولا رجعتنا الأسئلة
المستسهلة العيشة الحرام
أنا وإنتى كتلة حب غاويين لنتقام
وسلام على البدن السلام المستكين
أنا وإنتى مش ناويين نحارب أى حدّ
الا الأ بَدّ ابن الأبَدّ المفترى
الليل سكوت
والكون طرى
والأرض قنطار قطن معروض فى المزاد
وواقفله خمسين مشترى
وقلم رصاص فى ايدين منادى الذل
رافض ينبرى
( وبلدنا ع الترعة )
بتنكش شعرها
وعمّالة ترطن بربرى ف وسط العيال
مين اللى قال إن الوطن
محتاج كلاب تحميه على حدود الكنال ؟
مين اللى قال إن الوطن
ما فيهوش كذا مليون جمال ؟
مين اللى قال إن الوطن
صايبه الكساح والانحلال ؟
مين اللى قال
إن المسيح شدّ الرحال ؟
مين اللى أهدر دمّنا
وخلاه حلال وسط السكك؟
أنا وإنتى جوز عصافير
بيرسم ع الدكك حرفين وقلب
أنا وإنتى جوز عصافير
بيرمح ع الطريق ورا أى كلب ويهبشه
ويخربشه بمنقار برئ
أنا وإنتى جوز عصافير
جرئ زى النهار
لا يهمنا الدرويش
ولا بتاع القرار
أنا وإنتى جوز عصافير
بيعشق لنتحار
تعليقات