فيلم كرتون
دلوقت
الساعه تدق 12 نص الليل
دلوقت تمام
ممكن تفتح راديو العمر
ممكن تسمع
صوت البنت أم ضفيرتين
الطالعه تبص عليك
من بين دهاليز الروح
علشان ترميلك وردة بكره ف حجرك
وتقول لك تصبح على خير
دلوقت
الساعه تدق 12
وإنت لوحدك
عمّال تتبصص زى الديب الخايف
على سقف الأوضه وورق الجورنان المبلول
ورغيف العيش الناشف
والبوتاجاز الوالع
والميّه اللى بتغلى
وصورة الموناليزا الفالصو
الدايره تبص معاك
على أركان الأوضه الفاضيه تماما
إلا من الدخان
عمّال بتلملم
كل مشاعر قلبك
لجل تواجه وش الدنيا
بضحكة حب
وكلمة شوق
علشان تتخلص من مسحوق الصمت
وتتدغدغ خوفك
فوق من تلتوار العتمة
وتوزع أول لعنة شتمه هتطلع منك
على أشباح العالم
ساعة الصبح
عمّال بتحارب
كل جيوش القلب الخايفة من العفاريت
وبتلضم
عقد حروف أرواح الأوضه
ف خيط الورق الأبيض
عمّال بتشد ف خصلة شعرك
بتتابع
حركة سن القلم الحبر ف إيدك
وإنت بتكتب شعر
عن الثوار والثورة ف شكل قصيدة حب
الساعه خلاص
هتدق 12
والبنت بتاعة إشارات ضبط الوقت بتعلن
إن الأرض بتخلع روب النوم
وهتغسل راسها
وهتطلع تلبس فستانها السواريه
وهتحضر ويانا مراسم
حفل استقبال اليوم الجاى
طبعا :
_ عمّال تتخيل شكل الأرض
وهى بتخلع روب النوم
وبتغسل راسها
قبل ما تلبس فستانها السواريه _
الساعه خلاص
هتدق 12
والبنت بتاعة إشارات ضبط الوقت بتعلن
إن جميع أجهزة العالم
واقفه دقيقه حداد
على روح اليوم الماضى
وبتستنظر بكره الجاى بفارغ صبر
طبعا :
_ لفتت نظرك كلمة " فارغ صبر "
ودى أجهزة العالم
مش
أجهزة البطن اللى بتتعارك ساعة الجوع _
الساعة 12 إلا دقيقه وربع
وإنت بتسمع تصاريح الدنيا
وبتكزّ على سنانك
م البنت بتاعة
إشارات ضبط الوقت
وبتلعن :
ريحة عرق الأوضه
تصاريح أجهزة العالم
وش مراية الحمام المشروخه
دواوين الشعر المتبعتره فى الصاله
صراصير الشقه الدايره تبص من اللجحار
أم بريص
الواقفه تعاند فيك على وش الحيطه
طعم سيجارة كليوباترا المكتومه تمللى
ولاعة الغاز الفاضيه
ريحة الشاى البارد
مواعين المطبخ
داير تلعن
كل وشوش الزحمه الكاتمه عليك
وإيديك
عمّاله تدوس على زر موبايلك
لجل تكلم حد
الساعه 12 إلا 12 ثانيه ونص
والعالم هس
ومافيش مخلوق
بيحاول يطلع من جواه
علشان يطّمن على براه
الكل مكلفت روحه ما بين دراعاته
ونايم موت
الكل سكوت
والبنت بتاعة إشارات ضبط الوقت
ما بتبطلش
الساعة 12 إلا 11 ثانيه
العقرب ماشى ليم 12
الدنيا هتبدأ تعزف غنوه جديده
اسمها "دلوقت "
الساعه 12
بالتوقيت الرسمى لدهاليز روحك
دلوقت
ممكن تفتح
شبابيك القلب
وتطلّع م التسريحه " صباح الخير "
وتبعترها على الأرواح النايمه
وتريّح ودنك
من فيلم الكرتون
اللى البطله بتاعته
البنت بتاعة
إشارات ضبط الوقت
وتبوس صور الأولاد بشويش
وتمطّع جسمك
بين أرواح عفاريت الأوضه
وتشد لحاف الخوف _ برضك بشويش _
وتنام
بشويش
بشويش
بشويش
تعليقات