معالم رفض
(( ذنب ))
****
بحبك بقوّة
بحبك وعامل فى حبك فتوّة
بحبك ولو كلهم أرغمونى
هقول إنك إنتى الملاك اللى جوّه
وذنبى إن أنا من هواة الغلابة
وذنبى إن أنا اللى احترفت المروّة
بحبك ولا عمرى قلت إنى (( ماركس ))
ولا عمرى مرّة إدّعيت النبوّة
***********
(( فداكم ))
****
حياتنا فداكم
ودايرين نبارك وندعى لخطاكم
ولو يوم عطستم
بنعطس معاكم
ولكنّكم لو دخلتم جهنّم
أكيد مش هنغلط وندخل وراكم !
**********
(( سؤال ))
****
يبقى امتى العيد مبارك ع الغلابة ؟
الاجابة ............................
لو دياب لمّ الزغـــــــــــــــــــــــــــــــــــــــــــــــــــــــــــابة
*******
(( أى حــــــــــــــــــــــــــــــــــــاجة ))
****
عيونك تجنّن .... وسحرك رهيب
ياريحة الفواكه .... يا طعم الزبيب
بحبك بكل اللغات اللى تهوس
بحبك بكل الكلام الغريب
يالحظة سكوتى
يا عنوان لصوتى
يا كرباجى لمّا المدى يبقى ديب
يا ريحة البنفسج
يا كلمة أديب
بحبك بحبك ولو كنتى (( ثومة ))
هكون أى حاجة ... غير العندليب
********
(( مراكب ))
****
قلوع المراكب ملتها السياسة
قلوب المراكب كستها الكياسة
ضهور المراكب ركبها الكناسة
فايات المراكب هنا بيفتلوها
عشان يعملوا للمراكب رواسة
******
(( بعد ))
****
بين عيونى وبين عيونك
بحر أوسع من بحور السندباد
بين عيونى وبين عيونك
وردتين
وسفر مبعترنى على حدود البلاد
بين عيونى وبين عيونك
حلم بينبّت فى أحضان الولاد
بين عيونى وبين عيونك
خطوتين لكن بعاد
*********
((كرباج ))
****
لسعة الكرباج رضيّة
رفعة الكرباج بتوجع
عن رصاص البندقيّة
ضربة الكرباج بتمزع
فى الجلود البربريّة
بس طعم الموت على الكرباج
أحن من الوقوف ..
. تحت الرايات الأمريكيّة
******
(( مطالعة ))
****
يا تاريخ الطيّبين فى غيطان بلدنا
الزراعة الفالحة طالعة
يا علم مرسوم على جتّة ولادنا
الرايات ع الضفّة والعة
يا غناوى التورتة فوق تواريخ ميلادنا
كلنا ساقطين مطالعة
*******
(( 2100))
****
فى السنة (( 2100 ))
يمكن الأحوال تكون زى النهاردة
يمكن الأحوال تكون أحسن شويّة
يمكن الأجيال تكون زيّينا باردة
يمكن الأجيال تكون أبرد شويّة
فى السنة 2100
يمكن النيل يبقى أوسع
والحياة تصبح طريّة
*********
(( بلنتى ))
****
زى ما أنتى
ضحكتك تشبه لبنتى
بس نفسى تحكّمينى
كنت أقوم وأحسب ودينى
لشعبك الغلبان ..
. بتاع خمسين (( بلنتى ))
********
(( السلام ))
****
عيدان الحطب شكلها مش تمام
وريحة القرنفل بقت مش تمام
وبطن النشيد اتملت بالكلام
فناموا جميعا وشدّوا الحرام
عشان بكرة لازم نقف فى الطابور
ونقرا على الطيّبين السلام
*******
(( نشيد ))
****
كلامك بيوجع وقلبك شديد
وايه يعنى لو قلبى كان من حديد
هلوّن عيونك
وهرسم ملامحك
وها اكتب مع المخلصين النشيد
*******
(( رفض ))
****
برغم انى عارف
ورغم انك أنتى اللى عارفة
انى عارف
مانيش بايع الحلم جوّا الحوارى
ولا بايعك أنتى لوزير المعارف
*********
(( كلور ))
****
معايا المخلل بطعم البطاطا
معايا المؤنث معايا المذكر
معايا انحطاط ع السكك وانحطاطة
معايا الحلل والقلل والتناجر
معايا الأناجر وطقم الخياطة
معايا اللوازم بتاعة المسبّك
معايا المحبّك معايا المشبّك
معايا الحدايد بتاعة الخراطة
معايا معايا ولو مش معاكم
معايا الكلور اللى يجلى البلاطة
*******
(( وايه يعنى ))
****
وايه يعنى تيجى
وايه ما تجينيش ؟
وايه يعنى قلبك
ما بيحبنيش ؟
وايه تشتكينى فى يوم للمعلم
وايه تشتكينى فى يوم للشاويش ؟
ما انا ( م ) البداية أساسا بحاول
ولكن بحاول وأنا ما معاييش
*******
((سلم الحلم ))
****
على سلم الحلم كنّا جماعة
وقلنا هنطلع سوا فى الاذاعة
ظبطنا الثوانى وظبطنا الدقايق
وخدنا الحقن للّوز والمناعة
ولمّا الهوا قام يهز الشواشى
لقينا الاذاعة .... أساسا بتاعة
******
(( فـــــــــــــالح ))
****
طعم السنين مالح
شكل الكلاب كالح
كل الحمير فالحين
وأنت اللى مش فالح
*******
(( مسألة دماغ ))
****
عزيزى وعزيزتى
وعزيزتى وعزيزى
كلامنا على القهوة نصّه انجليزى
وفولنا المدمّس بنكهة انجليزى
وربّك يسهل ونخلع دماغنا
ونلبس مكانه الدماغ الماليزى
******
(( إجابة ))
****
يعنى ايه معنى الحصيدة ؟
يعنى ايه وجع القصيدة ؟
السؤال مالهوش اجابة
غير على الجتت العريضة
********
(( سيدى ابراهيم ))
****
فى سيدى ( ابراهيم ) التواقى ببلاش
بنرمح ونصرف وما يهمناش
ومات اللى ميّت وعاش اللى عاش
ومين قال فى مرّة اننا ما معناش
ننفض جيوبنا
وننفخ قلوبنا
وربّك يخلّى لنا بيبسى وكاكولا
معاهم حياتنا انتعاش × انتعاش
*******
(( لون ))
****
زمان
كنت ممكن أحبك بلونى
وأزوّق عيونك بريحة الشوارع
ودلوقت برضك
هحبك بلونى
ولكن هحبك بطعم الكوارع
*******
(( عرقسوس ))
****
بلاد المدمّس بتشرب فى بيرة
وقشر المدمّس بقى بالفلوس
ياريتكم برعتوا فى صنع الخميرة
وكنتوا اتلهيتوا مع العرقسوس
*******
(( ثقافة ))
****
ثقافة بلدنا فى غاية السهولة
خلص جيل ميراندا
ودخل جيل كاكولا
وكلنا المكايزر وكلنا المشايزر
وأجيالنا طالعة فى غاية الفحولة
وربك ييسر
.... وكلبك يبصّر
ويكسب تلات بوسترات *جاد شويرى *
ويكسب كذا ألف بوستر _ لرولا _
**********
(( بيان ))
****
لبسنا التواقى وخلعنا التواقى
ورحنا اشترينا ونسينا البواقى
ودوسنا الفيران اللى ساكنة الشوارع
ودوسنا الحناشة اللى ساكنة الشراقى
ولفّينا وسط البشر فى المياقى
وشدّينا ويّا التيران السواقى
ولمّا استقمنا
وراقت وقمنا
قرالنا المذيع البيان العراقى
(( كلام ))
****
أنا مش مهيئ للكلام دلوقت
ودماغى من ساعتين ماهيش فاضية
لكن يجوز لمّا السما تزهزه
أرسم لروحك كلمتى القاضية
*********
(( شاعر ))
****
لو كنت شاعر
ما تحاربش بنار
ولا تحنى راسك نحية الدوّار
ولا تركب الموجة مع المعاتيه
وتقول ادينى مساير التيار
ولا تبتسم فى مواجهة الشطّار
لو كنت شاعر
دوس على زنادك
واضغط رصاص الكلمة فى الكفار
*************
(( سريس ))
****
طعم السريس
يهوس مع البكاكين
دايرين بناكل فيه بقالنا سنين
لا تعبنا منّه فى يوم وكلّينا
ولا يوم بترنا وقلنا مش واكلين
************
(( وجع دماغ ))
****
كل الأمور فللى
ووضع البلد مظبوط
والنخل باصص للسما ومبسوط
بس اللى واجع راسنا من ساعة
الفرق بين البورية والقرموط
***********
(( وحياة أبوك ))
****
وكإنك انت الملك
واحنا العبيد عندك
ملعون أبو الزمبلك
اللى انتنى وساندك
***
وكإنك انت الملاك
واحنا العبيد الدون
صوتك دقيق للغلابة
وضحكتك أفيون
***
وكإنك انت البطل
واحنا اللى رافضينك
دايسين على مخدتك
ومطلعين (( **** ))
***
وكإنك انت العزيز
واحنا اللى فى البرواز
وكإن جسمك أساسا
من خلايا قزاز
وكإنك انت اللى مسموح لك
تدوس فينا
وتسوق كلابك علينا بالزلط والجاز
***
وكإنك انت اللى طالع فارع الهامة
وكإنك انت اللى عامل
فيها علّامة
برطع براحتك
وحارب فينا بكلابك
وحياة أبوك لتضمنا قيامة
تعليقات