مالطة
كإنك تماما
بتدن فى مالطة
فى كل المسائل *** مافيش أى غلطة
هتقلب دماغك
هتختم بجلطة *** وهتطلع بلادهم
تمام التمام
علينا وعلى الطيبين السلام
وأكل المدمّس ** ومطّ الحرام
ولمّ السبارس ** وشدّ الحزام
وقطع اللسان اللى جوّا الدفاتر
وشطب الكلام اللى وسط الكلام
وضرب الدّماغ اللى ممكن تفكر
بقالب رخام
عزيزتى الكريمة
وعزيزى الهمام
ياريت إصطباحتك ** تكون زىّ وشك
وصايم وساكت ولابس لجام
ياريت اصطباحتك ** تكون زىّ وشك
وسقعان ورافع شعار الزكام
عزيزتى الكريمة وعزيزى الهمام
تصحّ المسائل ** تبوظ المسائل
هتبلع لسانك ** هتكسب برام
وشوربة كوارع ** وأكلة حمام
ما تخرب تضيع وأنت مال اللى جابك
فى يطلع سخام واللا ينزل سخام ؟
عليك إلتزام القواعد يدوب
واحترام النظام
*****
عزيزتى الكريمة وعزيزى الكريم
هنبدأ نكرر كلامنا القديم
ماتشغلش بالك بتاتا بحاجة
زرعنا الخواجة وحصدنا الخواجة
وهنعمل قريّب فريق للحريم
هتسكت حياتك هتصبح نعيم
وايه يعنى يطلع ( حسام ) العميد
و اللا ( صالح سليم ) ؟
وايه يعنى فاز الزمالك بهاتريك
( لعبد الحليم ) ؟
وايه يعنى تحلم تكون الزعيم ؟
هتلعن أبونا ** وهتأمر وتنهى
وهتطلع كلابك تشم النسيم
وايه يعنى تحلم
تكون الزعيم العظيم المهاب ؟
هنخسر حياتنا وهنهتف وراهم
دا جايب وجاب
عشان طمعانين فى الفراخ والكباب
نراضى المغفل ** ونرشى الهباب
ونقعد فى ريح الطريق نستمنّى
ونستنّى واحد يسوق الكلاب
وكالعادة يطلع سيادة الغراب
*****
سيادة الغراب الكبير ابن داية
وكان شكله أصلا ** غلط م البداية
قالوا لنا إن كل الأمور استتبّت
وصدّقنا طبعا كلام السراية
وربّك يسامح ضميرنا الكويّس
ويغفر ذنوبنا اللى جوّا النوايا
********
سيادة الغراب الكبير إبن داية
ورمح فى العروق
وداس ع الحقوق
هتهتف معاهم ** هتكسب ولاية
وهتهتف عليهم ** هتكسب خاذوق
وحبّة كوالح ** وحبّة نشوق
ويمكن تفوق تحت سنّ البنادق
ويمكن تفوق وسط شلّة ( ع . ل . و. ق )
ويمكن تكسّل أساسا تفوق
سيادة الغراب الكبير ابن داية
ورمح فى العروق
ورافض يسوق البلد للأمام
وسايب لكلب الحراسة الزمام
*****
علينا وعلى الطيبين السلام
والكلام لو يضايق
مافيش حدّ فايق
مافيش حدّ رايق
مافيش حدّ دايق حلاوة زمان
كإنك تماما بتدن فى مالطة
وما فيش صنف واحد معاك فى المكان
بتدّن لوحد ** وتهتف لوحدك
وعايش لوحدك طويل اللسان
وداير تخبّط فى كل البيبان
وعمّال بتحلم بآخر بيان
بتدّن فى مالطة وما فيش حدّ سامع
وصوتك بينهج فى وسط الأدان
*****
سنان الفقير فى اشتياق للبرام
ما فيش حدّ بان من شيوخ المقام
علينا وعلى الطيبين السلام
والكلام فى القضية
سنين واحنا دايرين بنزرع ونقلع
ونلبس ونخلع فى قلب الوسيّة
ودايرين بنبلع أمورنا الرديّة
ودايرين نطبطب على البندقية
ودايرين بنهتف لكلب الحراسة
ودايرين نبوس فى الأيادى الغبيّة
هتبلع لسانك ** هتكسب هديّة
وهتصبح حياتك معانا انسجام
*****
علينا وعلى الطيبين السلام
و الكلام والزعيق
ما فيش حدّ جاهز يدرّب فريق ؟
مافيش حدّ جاهز ينجّى الغريق ؟
ما فيش حد جاهز يقف ع الطريق ؟
ما فيش حدّ جاهز يزعّق فى مالطة
يجوز حدّ يسمع ويبعت دقيق ؟
ما فيش حدّ جاهز
مافيش حدّ جاهز
ما فيش حدّ جاهز يبطّل نهيق ؟!!
تعليقات
انا بحبك وبادعيلك بعمر مديد
حبيب قلبى السعيد شحاته
شفتك فى منتدى سماعى فى مشاركتك موضوع الشيخ محمد عبد الهادى من خلال اميلك دخلت مدونتك ولى لاقاء معك اخر
-------
محمد زغلول/ خبير الفولكلور المصرى باطلس الفولكلور فرع كفر الشبخ
mz_folk@yahoo.com
واحشنى جدا والله
شرفت المدونةوالله
أنتظرك هنا وهنااك
ههههههههههههه