غناوى الدرويش

أنت أرنب واللا فخّ عامل ايه والناس بتصرخ والقصايد نازلة رخّ عامل ايه والحلم عاجز والجمال بدأت تنخّ واللى عاش انطخّ بعيار السكات احنا عايشين فى الحقايق واللا عايشين فى التحف والأنتيكات واللا رافضين الثبات فى المهزلة القصة مش قصة قصيدة مسلسلة القصة قصة قنبلة القصة قصة صوت يحل المسألة بقلب الحكيم واللا احنا ضلينا الصراط المستقيم واللا أنت حلّك كان سليم والناس غلط ممكن يكون حلّك سليم رغم العبط فى المعطيات رغم انحطاط الأزمنة رغم الطاعون اللى اتزرع جوّاها من ستين سنة رغم الضحايا المزمنة وصهد القلوب رغم الدروب العتمة و الوجع الدءوب شد الوتر على صدرك العريان وكربج فى الحروب وإن كنت مش قادر على شوال الذنوب جرّب تتوب البيت أكيد ليه رب ورجال مخلصين ومخالى طوب تقدر تتوب وتسيبنا نقرا كتابنا من أوّل حروف الأبجدة ستين سنة بنصرخ طاعون ولا حد بيلبى الندا ستين سنة وسجيل نضب واحنا الطيور المجهدة ستين سنة وعرق الفشل مزروع فى صدر المنتدى ستين سنة وقلب العدا كرباج غبى ستين سنة وأطفالنا بتقول والنبى كان نفسنا نموت فى البيوت ما نموتش بين أنياب كلاب الأجنبى ستين سنة ودم الصبية بيجرى فوق دم الصبى ضمين...

على قهوة قلبك وأنت مربـــّع ايديك وممدد روحك فوق منك وبتهتف (لأه ) بعلو الصوت مالمحتش شجر التوت رافض يحبل بالتوت مالمحتش قطر الموت بيئن ما قامتش فـ راسك فكرة تخلّى عنيها تحن ولا فكرة تخلّى الناس تتجن ؟ ولا فكرة تقلّب كل ضحايا الفن الراقى فـ قاع فنجان ؟ ولا داس جوّا عروقك فنان مشتاق للضىّ على قهوة قلبك وأنت مربـــّع ايديك وممدد روحك فوق منك وعنيك عمــّالة بتتمقق فى بنات الحى ما شربتش ويــّا حبيبتك شى ّ و غنــّيتوا ( لسيد وامام )* ما مسكتش ايدها ما حاولتش تلمس شفايفها بريشة رسام ولا بصـّيت ويـّاها لقدام ع المستقبل ؟ ولا نطـّيت بتمرّد ( فـ ) عنيها تشوف الصبح بيطلع فين ؟ ما عر فتش باب جنتها منين ؟ ما حاولتش تضغط على جسمك وأنت معاها ما حاولتش تسرق من جواها غناوى النور ؟ وملاك الريح عمال بيزيح فى حيطان الدور والجو مهيئ ع الدكة ؟ وعنيك عمالة بتنزف شر والحر ملهلب ع السكة ؟ والناس بتدوّر على فكة ستاشر ساغ على قهوة قلبك وأنت مربع ايديك وممدد روحك فوق منك وركابك عمّالة تخبّط م الخوف والبرد ما قريتش اسمك على كارت نضيف كان واقف يحرس حزمة ورد ؟ ولا فاتت بنت ف ريح منك واخدة الشارع بالطول والع...

لأن الربيع لسّه ساكن ملامحك نويت إنى أسامحك نويت إنى أصالحك وأصارحك بخوفى ياريتك تشوفى البراح اللى فيــّا ياريتك تحسى بملامح طفولتى وتنسى إن قلبى انسخط بندقية وتنسى ان روحك فى كف البلابل وتنسى ان روحى ف أيادى الضحية وتنسى انى لحظة ما شفتك بقلبى نويت انى أغمّض ( وأخاصم عنيا ) نويت إنى أضمك برقة مشاعر لشاعر زهق م الليالى الرديـــّة يا روح الملايكة اللى شالت وحطت ونطت فى هيكل وصارت صبية لمستك وحاسس برعشة ايديا لمستك وحاسس برعشة ايديكى اللى هزت وريدى مانيش عارف اوزن عنيكى اللى تهوس بصوتى الصعيدى مانيش عارف ألمس شفايفك بإيدى وحاسس برغم العرق والمناهدة بإنك لبستى الكيان الحديدى ياريك تعيدى بمشاعرك معايا عشان قلبى يقدر يحس إنه شايفك ولامس حدودك فى كل الزوايا عشان قلبى يقدر يحدد ملامحك فى عب المراية يا حفنة كلام علمتنى الغواية ما حدش يغامر ويعشق بقوة اللا قلبى اللى داير بيهتف ورايا ما حدش يغامر ويعشق بقوة اللا قلبى اللى ساكن كشوف الضحايا يا حفنة كلام علمتنى الغواية رسمتك حكاية رسمتك فى صمتك معالم بداية رسمتك شعار للأمل جوّا راية رسمتك ملاك واتحسب ع الصبايا رسمتك قصيدة لمعانى المحبة وناوى انى...

(( لاوندى )) ------ وقالوا انى شاعر وقالوا انى عندى وقالوا ان أبويا الفقير كان أفندى وحطّوا القرنفل ف ريح لاستاكوزا وحطّوا البلوظة ف مكان السفندى وسنّوا القرار اللى أنا من خلاله ما نيش قايل الشعر غير باللاوندى *********** (( مخابر )) ------- مالولنا البلد بالكلام ع المنابر مخيمر يكدّب وسيد يكابر وما أعرفش ليه البراءة بتاخدهم ف لحظة ما تنزل ايدين المخابر ************** (( بدونك )) ------- لأنك بتسرقنى ضحكة عيونك لأنك ما شفتش بتاتا بلونك لأنك بتهبلنى لحظة جنونك رسمت ابتسامتك وواقف بهاتى نويت انى أعيش وانى أكمّل بدونك ****** (( ياريت )) ----- بننده عليكم بعلو الحناجر ياريتكم تسنّوا العدد والخناجر ياريت تستعدّوا لعذابى وعذابهم عشان استوينا وما حدّش مهاجر ************ (( أمنية )) ------- رسمتك على دماغى وردة وسفينة وداير فى حبك مشغّل سرينه وعامل فى وسط البلد أزعرينا بحبك ونفسى أشتغل لك حرامى عشان أقدر آخدك ونطلع مارينا ********* (( خيبة )) -------- كتبتينى كلمة محبة وسلام رسمتينى طلقة وجع وانتقام بدرتينى وردة ف غيطان الحمام لمستك نسيتنى ونسيت الكلام ومن خيبتى قمت وعملتك امام ********* ((...