عكاز
على قهوة قلبك
وأنت مربـــّع ايديك
وممدد روحك فوق منك
وبتهتف (لأه ) بعلو الصوت
مالمحتش شجر التوت رافض يحبل بالتوت
مالمحتش قطر الموت بيئن
ما قامتش فـ راسك فكرة تخلّى عنيها تحن
ولا فكرة تخلّى الناس تتجن ؟
ولا فكرة تقلّب
كل ضحايا الفن الراقى فـ قاع فنجان ؟
ولا داس جوّا عروقك فنان مشتاق للضىّ
على قهوة قلبك
وأنت مربـــّع ايديك
وممدد روحك فوق منك
وعنيك عمــّالة بتتمقق فى بنات الحى
ما شربتش ويــّا حبيبتك شى ّ
و غنــّيتوا ( لسيد وامام )*
ما مسكتش ايدها
ما حاولتش تلمس شفايفها بريشة رسام
ولا بصـّيت ويـّاها لقدام ع المستقبل ؟
ولا نطـّيت بتمرّد ( فـ ) عنيها
تشوف الصبح بيطلع فين ؟
ما عر فتش باب جنتها منين ؟
ما حاولتش تضغط على جسمك وأنت معاها
ما حاولتش تسرق من جواها غناوى النور ؟
وملاك الريح
عمال بيزيح فى حيطان الدور
والجو مهيئ ع الدكة ؟
وعنيك عمالة بتنزف شر
والحر ملهلب ع السكة ؟
والناس بتدوّر على فكة ستاشر ساغ
على قهوة قلبك
وأنت مربع ايديك
وممدد روحك فوق منك
وركابك عمّالة تخبّط م الخوف والبرد
ما قريتش اسمك على كارت نضيف
كان واقف يحرس حزمة ورد ؟
ولا فاتت بنت ف ريح منك
واخدة الشارع بالطول والعرض
ولا حدّش حط ف راسك ( فرد ) *
وقال لك قوم ؟
ما حاولتش لحظة تدوس ع الخوف
وأنت بتتشاقى ف أوضة النوم
وأنت بتضغط بايديك على وش الكوميدينو
وبتنزف همك بين لدراج ؟
وأنت بتقرا ( فـ) وجع (الحلاج ) وبتتقطّع
وأنت بتتمطّع وكأنك قرص بلازما ؟
ما قريتش ملامحك فى مرايتك
من غير جزمة ومن غير ببيون ؟
الكون مجنون وأنت مخاوى
قلبك ( براوى وسحراوى ) ومحتاج تصليح
محتاج ( ثورة تصحيح ) تانية
محتاج تقرا الدنيا بترتيب الحبّيبة
محتاج يطلع مليون خيبة
علشان العالم يعمل لك
وسط المهابيل شنّة وهيبة
ويحطك وسط الناس الهاى
الناس الفاهمة الدنيا ازاى ومنين وامتى
تعرف لو كنت طاطيت راسك
مش ممكن كنت هتبقى انت
ولا كنت هتبقى الابن الشرعى لماما ( زينات )*
ولا كنت هتزعل لمّا الخلق تقول فى ودانك
( بيرم )* مات
ولا كنت هتلبد فى طلمبات المكن الساكت وتعيط
وتخيّط أوجاعك بشويش
وتجهز نفسك للخفافيش السعرانة
قلبك مش حتة رمانة
قلبك دانة
قلبك فدان مليان شواكيش
قلبك تورتاية ولقمة عيش
على حتة جبنة قريش ناعمة
جهز نفسك علشان بكرة
هتكون عكاز والدى الأعمى
*************************************************************************
هامش :- * سيد درويش _ الشيخ امام عيسى
:- * فرد = مسدس
:- * ماما زينات = شاعرة الشعب زينات القليوبى
تعليقات
*********
تصفحت مدونتك و سعدت بالتعرف عليها.
الموهبه تظهر بوضوح بين السطور.
أعدك بتكرار المرور.
تحياتى
انتظرك هنا دائما
ودائما بخير ان شاء الله