وسط الثوَّار

بواسطة -

طلعت بلدنا بتتظاهر
وعمنا الشيخ "عبْ ظاهر"
ابنه الحِلِيله بيتطاهر
وطلع يصاهر مولانا
طب مين هيهتف ويّانا؟!
طلعت بلدنا بتتظاهر
من عند باب الزنزانه
وف عبها شوية أناشيد
وف إيدها رمّانه ودانه
بتضمنا بياسمين وجريد
وبتبتسم من جوّانا
وبترسم الفرحه معانا على التلتوار
ماشيين عشانك متحاصرين
وكأننا جيوش م الكفار
ماشيين عشان خاطرك حافيين
وبنهتفك وسط الثوار
إنتِ الوَنَس وإنتِ السُّمّار
وإنتِ العسل وإنتِ الصبّار
وإنتِ الحصار بين ألْف حصار
وإنتِ انتصار الحجَّاله
واقفين عشان خاطرك زِنْهار
وبنشربك فى القيّاله
إنتِ الشِعار أبو غمّازتين
وإنتِ الخيول والخيّاله
وإنتِ العَمَاله اللى ما تكويش
وإنتِ البَطَاله العَمَّاله
طلعت بلدنا بتتظاهر
شايله العيال مش متشاله
بتوزّع النور - ع - الواقفين
وتقول مانيش ناقصه عوَاله
طلعت بلدنا بكوز عنَّاب
ورساله لإيدين شغَّاله
طلعت تعض بضرس وناب
على كل جيب أو سيَّاله
طلعت بتحويشة الكُتَّاب
وبكل شيء فى الحصَّاله
طلعت بلدنا بعود لبلاب
وضفيره وغويشه وبَالَه
وقميص وتلفيعه وقبقاب
وشعار رموه فى الزَّبَّاله
وقلم ونوته ورِقّ وناى
ودموع فى منديل وحواله
وكتاب وضحكه وبرّاد شاى
وقصيده لعيال قوّاله
وصور لصاله وصوّاله..
بيتحدّوا الموت
طلعت بلدنا ..
و - ف- إيديها السيف النبوت
علشان تحاجى على الملكوت
طلعت بلدنا بعلو الصوت
تهتف: يا طاغوت
كل البيوت ما عدتش بيوت
بشر البيوت ما عادوش سكّه
أهل البيوت ما عادوش فكّه
طلعت بلدنا بتتظاهر من – ع – الدكه
واخدانا نهتف ع السكّه بعلو الإحساس
م القاضى لمراة الكنّاس
إحنا القلم وإحنا الكراس
وإحنا الأساس عالى وواطى
ما تغزُّونيش بماسوره نحاس
لا – ف – جنبى ولا تحت باطاتى
طلعت بلدنا بتتظاهر
ضد الهدوم الظباطى
ضد المدافع والمتاريس
ورصاصكم المش مطّاطى
ضد العروش والأنتريهات
ونظام مخاوى ووطواطى
ضد الغفير أبو ست اشناب
والمفتكس والصُرماتى
ضد الوجع والجوع والخوف
والفقر وابن القرداتى
ضد البيان السقراطى..
المليان تشكيك
ضد الكروش الباشواتى..
المحشيّه فريك
ما أعرفش جيتوا إزاى للناس
من غير جمل ولا تلِّيفريك
طالعين عشانكم نتظاهر..
من غير تكتيك
طالعين فى وسط ميدان الله
بكلور وشبّه وحق فنيك
نمسح ف أسفلت وسيراميك
ونقول فى ودن أبو دبّورتين
إنت ابننا وربنا يهديك
طالعين يا حامى المنتفعين
نحمى البلد علشان نحميك
طلعت بلدنا على الميادين
شايله المناجل والكواريك
وبتقرا ويانا الفاتحه..
إن ما فيش تَحْنِيك..
واللعب لنهاية الفُورَه
طلعت بلدنا من السلوم..
لسوهاج..
لطوخ..
للمنصوره..
طلعت بلدنا بتتظاهر
بكتاب وورده وسبّوره
وعمّنا الشيخ "عبْ ظاهر"
مش ناوى يطلع فى الصوره

تعليقات

إرسال تعليق

المشاركات الشائعة من هذه المدونة

دروشة

بواسطة -
صورة
كفر الكلام بالشعر والشعرا وبالكتاب قفل الكلام الباب على صباعى لا أنا عارف أفتح للمدى وأرمح ولا حاسس ان الشعر دا بتاعى ......................... درويش أنا وبقالى كام مليون سنة بسعى بلضم ضفاير حلمى فى الحواديت وبشيل وأحط فى أرضك الواسعة وببوس عيونك ويا كل نهار وبحن لك وأنا شايل القصعة .................... ضحكت آلاء بنتى وضحكت أنا وأنتى فى نص الليل ضحكة آلاء تشبه لميت قنديل .......................... ((هنا القاهرة )) (( هنا القاهرة)) فى نفسى انى أجيلك وخايف قوى لأقابل فى حضنك ولاد الـمرة ................................ قلبك بيشبهنى نبضك بيشبهنى روحك شبه روحى فى شيل الهم أنا وأنتى حبة دم فى زكيبة يا معلمانى ازاى أحب النور ومحسسانى تمللى بالخيبة ........................ زيك مانيش لاقى ف أراضى الله عيون سودا مولد يا ست الكل وبعودة مولد وعقبال ميت سنة قدام وتمام تماااااام كل اللى فيكى صبح تمام واحنا اللى ردينا لوره مستنظرانى ازاى وليه مستنظرة ؟ ما خلاص ما عدتش بحلمك خالص ولا عاد فى نفسى يا غالية غير حتة لمونة معصفرة ......................... طراطير ونبوت الغفير والناس كتير جوا الميد
قراءة المزيد

عــــوّاد

بواسطة -
ما تصدقنيش أنا مش درويش بيحب الناى والضلّيله ولا مارد ماسك كيله وداير أكيّل همّ الناس ولا حارس واقف يحرس راس سيدنا الوالى ولا كلب بينبح من غير صوت جوّا بلاط الباب العالى ولا نفسى أهتف تحت رايات الوطن الغالى بأيتها كلام ولا عايز أقول لك كنت إزاى وأنا قاعد أتابع ع الشاشه استشهاد صدّام وعيون مفتوحه وخلق نيام والعالم داير ينزف سم وأنا ماشى معايا يدوب الستر وحبّة دم ودعوة أم وكلمه ف كُمّ قميص دبَلان ما تصدقنيش لو حسيتى إن أنا مش سلطان لو قلبك حس إن أنا دبلان زى الصفصاف لو قلبك حس إن أنا خوّاف … ما تصدقنيش وما ترسمنيش على قلبك تانى وتتباهى وما تسرقنيش من توّاهى ف أرض النسيان و ما تنخدعيش فى كلامى المبدور فى الجورنان وتعاتبينى أنا عمرى ما كنت علم مفرود على جتّة طفل فلسطينى ولا كنت المنديل المليان بدموع الفرح الحطّينى ولا كنت السحبة اللى هتحذق وتفضّى الفرح الياسمينى على حدود بغداد ما تصدقنيش لو كل ولاد الحاره اتلمّوا وهتفوا بروح وبدن عوّاد عوّاد باع أرضه وسابها وهجّ والكل احتجّ والكون اترجّ عشان عوّاد
قراءة المزيد