غناوى الدرويش

يا بياعين السر فى الصاغه أنا قلبى غيط ياسمين وغيط نعناع وإن قستوا روحى بروحكم الباغه هطلع ملك وهتطلعوا الأتباع ******* "يارب " ....... يا مصيّر الملكوت بلا جواسيس علّم ملوك الأرض معنى العدل عمر الجبل ما هيتعدل لخسيس ولا عمر جنّه هتتفتح للندل ------- يا موقّّف السماوات بلا عمدان شمّم ملوك الأرض ريحة الموت يمكن يحسّوا إن الأجل قد حان فيوزّعم على شعبهم بسكوت -------- يا مدّى أمرك للقمر ينشقّ عمّم ملوك الأرض بالطّيبه ورّى الملوك إزاى يكون الحق وإزاى بليت الناس دى بمصيبه ------- يارب رحمه وصبر ع الابتلا إنت اللى قادر وإنت سيّدنا وإنت اللى واقفين فى بابك نطلب المسأله وقلوبنا مطّمنه بإنك هتسندنا

دلوقت الساعه تدق 12 نص الليل دلوقت تمام ممكن تفتح راديو العمر ممكن تسمع صوت البنت أم ضفيرتين الطالعه تبص عليك من بين دهاليز الروح علشان ترميلك وردة بكره ف حجرك وتقول لك تصبح على خير دلوقت الساعه تدق 12 وإنت لوحدك عمّال تتبصص زى الديب الخايف على سقف الأوضه وورق الجورنان المبلول ورغيف العيش الناشف والبوتاجاز الوالع والميّه اللى بتغلى وصورة الموناليزا الفالصو الدايره تبص معاك على أركان الأوضه الفاضيه تماما إلا من الدخان عمّال بتلملم كل مشاعر قلبك لجل تواجه وش الدنيا بضحكة حب وكلمة شوق علشان تتخلص من مسحوق الصمت وتتدغدغ خوفك فوق من تلتوار العتمة وتوزع أول لعنة شتمه هتطلع منك على أشباح العالم ساعة الصبح عمّال بتحارب كل جيوش القلب الخايفة من العفاريت وبتلضم عقد حروف أرواح الأوضه ف خيط الورق الأبيض عمّال بتشد ف خصلة شعرك بتتابع حركة سن القلم الحبر ف إيدك وإنت بتكتب شعر عن الثوار والثورة ف شكل قصيدة حب الساعه خلاص هتدق 12 والبنت بتاعة إشارات ضبط الوقت بتعلن إن الأرض بتخلع روب النوم وهتغسل راسها وهتطلع تلبس فستانها السواريه وهتحضر ويانا مراسم حفل استقبال اليوم الجاى طبعا : _ عمّال تتخيل شكل الأ...