العيار
يا معلّقه القلب الماديليا " ف" شنطتك
يا دايسه فوق روحى القزاز
يا راضعه حلمك
من بزاز صدر الشقا
ما تكلفتيش الروح فى عب الشرنقه
وما تسقنيش الحلم من غير معلقه
وما تاخدنيش من إيدى يم المشنقه
وتتهجى ويايا البيوت
أنا صوت آمون اللى اتنفض
ورفض خيطان العنكبوت
وأنا أعلى من صدر التابوت اللى انكسر
وأنا أى حد
هينتصر على شهوة الخيل الجموح
وأنا فرحة القمر اللى سهران ع السطوح
يا أم الضفاير
أعلى من شجر الطموح المنتهك وسط الخضار
يا بدر سهران ع السكك
مين يشبهك فى الاحتضار
يا عيدان لمون مستسلمه
ودبلانه فى الأرض البوار
يا عيون بتعشق لنتحار
فى قزايز الليل الغويط
يا شمس
خافت تتفرد على أى غيط
يا قلب
مصنوع من عجينة البسكويت
ما تحطنيش
على سكّة الوجع العبيط وتبصّ لى
أنا مش ولى ومانتاش مسيح
ما تحطنيش
قدام ضريح التوت وتخبط ع الوتر
وتدوس على الصدر الصفيح
يا قلوب
بتفتح صدرها لأيتها ريح
أنا مش جريح الورد وكيزان الدره
يا حضن أوسع من حيطان المندره
أنا مش أسير القاهره ومدّاح "كافور "
يا كلمه واقفه
لطلقة الشاعر على كفوف الطيور
يا قصيده ناويه
تفضّى حمل الموت على أكتاف السطور
أنا مش طاغور
أنا قلبى مش بنّايه بور فى إبراج ورق
ولا روحى كانت مفترق للانتقام
" أنا قلبى برج حمام " بيضحك للسما
وإنتى انتصار العولمه ف زمن الهياج
أنا قلبى صرخة حب
ساعة الاحتجاج والارتجاج
والانتهاج المر للموت الغبى
المفروض على صفوف النعاج
أنا قلبى مش كرباج بيسرج فى المدى
يا ستّنا الطاهره الشريفه السيّده الواخده القرار
ما تبّتيش على رايتك المرفوعه
فوق صدر البلد من غير شعار
وما تضغطيش على صدرى
لو هاج النهار ساعة الهزار
وما تعتبيش على روحى
لو فلت العيار وسط الحصار
يا ستنا الطاهره الشريفه الطيّبه
الواخده القرار وقت الغلط
هى البلاد ممكن يحررها الزلط ؟
واللا البلاد
ممكن يحررها العبط ساعة الصمود ؟
واللا البلاد
ممكن تعود من غير وضو ؟
يا مخلصين الأرض
قوموا استشهدوا وهدّوا السكوت
الأم
عايزه الابن لما يموت
يموت من غير ألم
الأم
عايزه الابن لما يموت
يموت تحت العلم
الأم
عايزه الابن
يعمل م السلاح ورقه وقلم
الأرض أم
ونفسها تحس الولاد الجد فى الوقت الصعيب
الأرض
مش عايزه الغريب
يركب على حصان الندى
الأرض وهبت دمّكم
فما تبخلوش
برصاص دماكم وإنتو فى وشوش العدا
يا ستنا الطاهره الشريفه
الواهبه ناسك للفدا
وواهبانى لكتابة الكلام
أنا مش إمام
أنا مش رسالة حب لأبراج الحمام
ولا كوز سلام
هتفرغيه للطيبين بعد الصلا
يا ستنا الطاهره الشريفه
الشايله فدان أسئله للامتحان
آن الأوان
للضحك ساعة التريقه
آن الأوان
نفتح على صدر السكك
عب الخطاوى الضيّقه
تعليقات
"لازم الأبنودى يعرف
إن مصر
ف كل يوم بتجيب غلابة"
احنا اعترفنا لك من فبل الابنودى