انتيكات
ياساكنة جوّا حنايا ضلعينى
بدرك ماهوش بدر البلاد البور
بدرك ماهوش وش الصبايا الحور
بدرك ولد مبتور فلسطينى
فما تربطيش عينى
وما تهتفيش ضدى هتاف الموت
وما ترغميش قلبك يوطّى الصوت
وما تغطسيش وتقبّى فى الملكوت
وتحسسينى إنك تابوت أعوج
وتحسسينى إن الكلام أهوج
وإن القصيد الحرّ مش فيّاض
وإن الوطن أصبح شعار فضفاض
وإن البلاد ما بقتش ولادة
وإن السكوت والذل مش عادة
وإن البلادة اتمكنت مــ الناس
وتحسسينى إن الوجع احساس
وإن التماس العذر شئ واجب
أنا مش مهيئ أصلّى للحاجب
ولا أوطّى راسى فــ ساحة الحراس
وأعجن قصايدى بارود وطوب ورصاص
وأهتف خلاص المعضلة اتحلت
كل البلاد رغم الصراخ ملّت
كل الأيادى الطيبة اتشلت
كل المراكب ضلّت المضامين
والدنيا وقفت عند يوم حطّين
والأرض رافضة تجيب صلاح الدين
والدانة فاتحة حنكها فى فلسطين
واحنا اللى باين شكلنا حالفين
لنقوم بدور الطيبين فى المهزلة
هوّ الكلام ممكن ينبّت سنبلة ؟
واللا الكلام ممكن يفجّر قنبلة ؟
واللا الكلام يقدر يثبّت قلبك الخوّاف
فى ساعة الزلزلة ؟
واللا الكلام ممكن يحل المسألة وتصبح تمام ؟
طب مين هيدفع ديّة الدم الحرام ؟
أو مين هيرفع لك شعار الانتقام من دمهم ؟
الأرض أرض الله ما هيّاش أرضهم
والعرض عرض المسلمين مش عرضهم
والطفل لحظة ما الرصاصة اتمكنت من قلبه
كات من عندهم
طب مين هياخد تارنا منهم
واحنا واقفين ضدنا مش ضدهم ؟
الأرض أرض الله ما هيش أرض الجبان
والعرض عرض المسلمين
مــ البصرة لحدود الجولان
والطفل لحظة ما اتقتل
مقتول بأمر الأمريكان
واحنا اللى قاعدين نبتسم
قدّام مسلسل أسمهان
يا أبو قلب أسرع مــ الحصان جوّا السكك
اضرب صاروخك
واجرى مين راح يمسكك ؟
ما أنت اللى ماشى بصدرك العريان هناك
واحنا اللى قاعدين عــ الدكك
اضرب صاروخك واجرى
مين راح يمسكك وسط البيوت المنهكة ؟
كل الرايات متفبركة
كل البلاد متأمركة وشدّة الحزام
طب مين هيدفع ديّة الدم الحرام ؟
أو مين هياخد حق أسراب الحمام المتعبة ؟
إنت اللى واقف للدانات
واحنا اللى قاعدين نرسمك عــ المصطبة
إنت اللى واقف للدانات
وإحنا اللى سايقين الغبا
إنت اللى قشّيت الوجع مــــــ المحلبة
وإحنا اللى قشّينا الصبا (فــ) عزّ النهار
هوّ الحصار ممكن يولّد غير حصار ؟
واللا الحمير
ممكن يسوقهم غير حمار ؟
واللا انهيار الدنيا
ممكن يبتدى فـــــ لحظة دمار ؟
واللا أنت ممكن نقبلك
دلوقت من غير إنتصار ؟
يا سادة يا بتوع القرار
فلت العيار
والانتظار ممنوع على يمين الطريق
وما تهتفوش
علشان هتافكم شكله هيضرّ الفريق
يانهار غميق ويا ليل غلط
الطفل واقف بالزلط
لجحافل التنين هناك
قلبك كما قلب الأسد
وايديك كما ايدين الملاك
احدف وعود
وملايكتك مستنياك
ارجع لهم ومعاك عزيمة الأنبيا
يا سادة يا بتوع القرار
أطفالنا واقفين بالزلط للأغبيا
واحنا اللى عاملين أوليا
وسكات ...... سكات
عايشين ودايرين نبتسم
لحظة ما يرمولنا الفتات
ما يهمناش الحلم عايش واللا مات
لكن المهم نقول آمين
ويحوّلونا لأنتيكات
تعليقات
و الله برافوا على الحــرِّيفة
كفة إيدهم ما هى خفيفة
شخنا الحنبل مال لحنيفة
لعبط فينا المدعو "خليفة"
بعد ما كان بيقولو أمير
أسس، نظم للتكفير
باعه فيها طويل و كبير
حامل درجة علمى خبير
لمَّا يقول : الكل آمين
نبرة صوته ..ياعينى حنين
تهبل ،تلـْوِح ف الملايين
تروى تشبع ف الجعانين
دا المدعو"خليفة" المتسيط
كات نظرة عينه بتشيط
المجدع فيهم بيعيـَّط
ولبقه يخرس و يخيط
دا أميرنا خليفه لو اتكلم
بيخلى العَـالـِم يتبلِّم
والجاهل لازم يتعلم
الدرس الجامد و يسلـّم
أصل خليفة بير و غويط
اوعوا تفكروا إنه عبيط
علشان باين ليكوا بسيط
اوعوا خليفة!! خليفة حويط
الحرِّيفة إزاى مسكوه !!؟؟
الحرِّيفة إزاى خلـُّوه!!؟؟
يقبل أبوهم يبقى أخوه،
جايز يمكن يوم سحلوه؟
طب ما خليفة ياما سحلنا
وبحكاياته كتير و سحرنا
حمس فينا كتير سعرنا
ليه يا خليفة ليه بتخنَّا!؟
والله برافو على الحرِّيفة
زرعوا فينا الأخ خليفة
ودن عميلة كبيرة حليفة
كتبت لينا نهاية سخيفة
كل خرابة وفيها عفريت
ساكن لينا فى قلب البيت
واتمددنا فى جنب الحيط
بس يا ريت يا أبو زيد ما غزيت
ألف خسارة عليك يا خليفة
بس برافو على الحريفة