شراع الليل

ما تحطش
آخر حتة حب ف قلبك جوّا رغيف
ولا ترسم طيف
على باب القاعة المتوارب
ولا تطلع برّة تحارب حدّ
المدّ بلاد
وايدين الأسياد ساندة الدّار
والغار الساكن جوّا حشاك
ما اندقّش فيه ولا طبلة زار
والتار مشوار وسلاح صاحى
أنا أحبك وأنت بتضّايق
وبحبك ومزاجك رايق
وبحب عنيك بتطّق شرار
من نار الطبع الفلاحى
وبحب ايديك لمّا تناحى فـ وتر الأيام
لو نفسك توصل يم هناك
بص لقدام
وازرعنى نهار على آخر شوفك
أشوفك مدنة وبرج حمام
وأبدر لك ميت فدّان بكلام مليان تخاريف
ما تحطش آخر حتّة حب فـ قلبك
جوّا رغيف للناس الدون
ولا تعمل مجنون فى الأحوال المقلوبة
أنا ضدّك
لمّا تكون فى بؤونة
وخلق الله عايشة فـ طوبة
وأنا ضدك
لمّا تحاول تلغى معانى الكلمة المكتوبة
وأنا ضدك
لمّا تحاول مرّة
تدوس على حلمى المتفسّر
وعدوّك
لما تبصّر ورق البلّك بالشيّاب
وتراهن بكلام الكتاتيب
ع العمّة وعلى شيخ الكتّاب
وينبّت قلبك بدل الحب
تقاوى كلاب تنبح جوّاك
وطيور أسود من شعر صبيّة بتستناك
علشان تدّيك وردة ياسمين
أنا مين وازاى
وازاى وأنا مين ؟
أنا واحد شبه البنى آدمين
بيخاف م النور
وبيعشق لون العتمة
اللى بترقص فى جيوب الدور
وبعيش جوّا المكن المهجور
المرمى فـ حضن البرّية
وبحب عيون الغجريّة
اللى بتعزف ناى للشاى الطايب ع الجمرات
وايدين الجدع اللى بتزرع
وبتقلع بشويش الحطبات
أنا ضدك
لما تحب مرات عمّك أيوب
وأما تعيش زمنك بالمقلوب
وأمّا الناس تحدف فيك بالطوب
وتحن لهم
وتحنّى لهم قلبك ف رغيف
ازاى وعنيك عمّالة بتلمح طراطيف دمّك
جوّا كعوب الهجامة
ودماغك لسّة بيروى طوبات الرجّامة
ازاى هتحن لفكرة قديمة وهدّامة
وبتهد جبال ؟
أنا صابر زيّك ومسالم
وطويل البال
وحرام انى أربط مهرى ف ضهرك
وأعمل على راسك خيّال
وحلال إنك تنقشنى قتيل
على ورق التين
أنا مين وازاى وازاى وأنا مين ؟
أنا واحد ماشى بطول الحيط
لا سابتنى أسود القصر أضحك
ولا كلب الغيط
ياشراع الليل يا غويط يا غويط
أنا ليه هربان جوّاك دايما زى الوطاويط
وعبيط بيعافر ( ع ) الدفّات
التعلب فات واللا إتأخر
وأنا صاحى وراك واللا بشخّر
يا شراع الليل يا طويل يا غتيت
يا أبو ميت حدّّاية وميت عفريت
يا شراع الليل يا طويل يا هبيل
أنا فيك وطواط
واللا أنا قنديل