فارس وساعة
لأن الربيع لسّه ساكن ملامحك
نويت إنى أسامحك
نويت إنى أصالحك وأصارحك بخوفى
ياريتك تشوفى البراح اللى فيــّا
ياريتك تحسى بملامح طفولتى
وتنسى إن قلبى انسخط بندقية
وتنسى ان روحك فى كف البلابل
وتنسى ان روحى ف أيادى الضحية
وتنسى انى لحظة ما شفتك بقلبى
نويت انى أغمّض ( وأخاصم عنيا )
نويت إنى أضمك برقة مشاعر
لشاعر زهق م الليالى الرديـــّة
يا روح الملايكة اللى شالت وحطت
ونطت فى هيكل وصارت صبية
لمستك وحاسس برعشة ايديا
لمستك وحاسس برعشة ايديكى
اللى هزت وريدى
مانيش عارف اوزن عنيكى اللى تهوس
بصوتى الصعيدى
مانيش عارف ألمس شفايفك بإيدى
وحاسس برغم العرق والمناهدة
بإنك لبستى الكيان الحديدى
ياريك تعيدى بمشاعرك معايا
عشان قلبى يقدر
يحس إنه شايفك
ولامس حدودك فى كل الزوايا
عشان قلبى يقدر
يحدد ملامحك فى عب المراية
يا حفنة كلام علمتنى الغواية
ما حدش يغامر ويعشق بقوة
اللا قلبى اللى داير بيهتف ورايا
ما حدش يغامر ويعشق بقوة
اللا قلبى اللى ساكن كشوف الضحايا
يا حفنة كلام علمتنى الغواية
رسمتك حكاية
رسمتك فى صمتك معالم بداية
رسمتك شعار للأمل جوّا راية
رسمتك ملاك واتحسب ع الصبايا
رسمتك قصيدة لمعانى المحبة
وناوى انى أغنى النشيد للنهاية
بحبك بكل اللغات الجريئة
بحبك بكل المعانى البريئة
بحبك برغم انى ماشى بدعاهم
ودايما بقدم عليا المشيئة
بحبك بحجم الكلام اللى داير
يخبّط فى راسى
ووحشانى رغم انى شايف ملامحك
فى كل الكراسى
وشامم روايحك فى كل المراسى
وعامل عيونك نشيدى الأساسى
وراسمك على ضلوعى شكلى ومقاسى
وحاضن ضفايرك وعايش وناسى
وتايه ما بين الكلام عن عيونك
وبين الوطن والتاريخ السياسى
وبين الأغانى اللى مالية الاذاعة
فى لحظة ما أضمك بحس انى قادر
واحس ان حضنك علاج للمناعة
أكيد كنت حاسّك فى لحظة ميلادى
وأكيد كنتى نقطة لبن فى الرضاعة
أكيد كنتى أول ملاك م الملايكة
يعلمنى أسامح سنين الوضاعة
ويرسمنى فارس
تعليقات
فى كل مرة اقرأ كلامك
اشعر انى امام شاعر كبير سيقف له التاريخ يوما ويعلن تقديره له
وسيكون قريبا جدااااا
مصر بخير وستلد دوما اقلام رائعة
ومن اروعهم قلمك
هذا سيتم بمشيئة الله اولا
ان شاء الله
واشكر ردك الرائع الذى يشبهك