طقاطيق ملام

(( لاوندى ))

------

وقالوا انى شاعر

وقالوا انى عندى

وقالوا ان أبويا الفقير كان أفندى

وحطّوا القرنفل ف ريح لاستاكوزا

وحطّوا البلوظة ف مكان السفندى

وسنّوا القرار اللى أنا من خلاله

ما نيش قايل الشعر غير باللاوندى

***********

(( مخابر ))

-------

مالولنا البلد بالكلام ع المنابر

مخيمر يكدّب وسيد يكابر

وما أعرفش ليه البراءة بتاخدهم

ف لحظة ما تنزل ايدين المخابر

**************

(( بدونك ))

-------

لأنك بتسرقنى ضحكة عيونك

لأنك ما شفتش بتاتا بلونك

لأنك بتهبلنى لحظة جنونك

رسمت ابتسامتك وواقف بهاتى

نويت انى أعيش وانى أكمّل بدونك

******

(( ياريت ))

-----

بننده عليكم بعلو الحناجر

ياريتكم تسنّوا العدد والخناجر

ياريت تستعدّوا لعذابى وعذابهم

عشان استوينا وما حدّش مهاجر

************

(( أمنية ))

-------

رسمتك على دماغى وردة وسفينة

وداير فى حبك مشغّل سرينه

وعامل فى وسط البلد أزعرينا

بحبك ونفسى أشتغل لك حرامى

عشان أقدر آخدك ونطلع مارينا

*********

(( خيبة ))

--------

كتبتينى كلمة محبة وسلام

رسمتينى طلقة وجع وانتقام

بدرتينى وردة ف غيطان الحمام

لمستك نسيتنى ونسيت الكلام

ومن خيبتى قمت وعملتك امام

*********

(( رصاصة ))

---------

وخليكى دايما براحتك أبية

وخلينى دايما معمّر سلاحى

ومستنى أطخ العيون الغبية

وخليكى دايما ترازى ف ملامحى

ودايما تسامحى الظروف الرديّة

وخليكى دايما رصاصة البداوة

وخلينى واقف هناك بندقية

********

(( كُره ))

---------

زرعتى ف وريدى الكلام الجديد

برغم ان قلبك برادة حديد

ورغم ان روحك اساسا جليد

ورغم ان أنا لما دبت ف وريدك

كرهت القصايد وسبت القصيد

**********

(( انسحاب ))

--------

لأن البلاد ماشية عاكر فى عاكر

لأن البلاد عايزة عيّل مذاكر

نويت انى أقوم وانسحب م المناظرة

وأسيب البلاد يحكموها العساكر

*************

(( خيال ))

--------

بلف البلد من جنوبها لشمالها

وداير بزيح فى استحالة محالها

وبعشق ملامحك وبعشق جمالها

ولو خيرونى ما بينك وبينى

هسيبك واسيبنى وهحن لخيالها

وهأشهد بان البلد لملمتنى

وكل البلاد كات بتاكل عيالها

*********

(( قضية ))

--------

صحيح انى مش من ولاد الضحية

وعمرى ما حبّيت آراء ماركسية

ولكنى رافض ولاد اللذينة

ورافض براءة الكلاب فى القضية

***********

(( ل نفسى ))

---------

البحر واسع واللا أنا اللى غويط

واللا الوصول فى بلدنا بالتنطيط

كل اللى راح بقلوعه يم هناك

راجع معاه ع الدفه زيط ومعيط

طيب عشان توصل تدلّع مين ؟

دلّع كلامك وابتدى يا عبيط

*********

(( أمومة ))

---------

1-

يا كل كلمة حب جوايا

أنا نفسى أقوم وارفع لها الراية

وأرسمها فيّا نهار ومعنى ودار

وأكتبها كلمة ف أول الآية

2-

دايما بحسك بين خلايا الدم

بتزيحى عن روحى الوجع والهم

بتضمى قلبى برقة العشاق

وبتحضنينى بعنفوان الأم

*********

(( سراب ))

--------

سنين وأنت داير فى وسط الكلاب

بتحدف عليهم ورود المحبة

وهمّا اللى بيعفروك بالتراب

وداير بترمح فى كل المفارق

وكل المفارق بتطلع سراب

***********

(( بلد ))

-------

بحب البلد بالطريقة الجديدة

بحب البلد والوجع فى القصيدة

بحب البلد حتى لو فرّغونى

وحطّوا ف مكان قلبى حتّة جريدة

*************

(( راية ))

--------

ممل الكلام وأنتى مانتيش قصادى

مميت الكلام وأنتى مانتيش معايا

ممل الكلام وأنتى لو مش بلادى

ما كنتش هعيش تحت أيتها راية

**********

(( مرارة ))

-------

وعلمنى سيدى إنى أحب بحرارة

وأدوّر على النصر جوّا الخسارة

وعلمنى أدوس ع الوجع فى العبارة

ووصانى أحب البنات البدارة

وسمعنى صوتك فى قلب المحارة

ووصانى لحظة ما مات إنى أغنى

مات بالمرارة ** فغنّيت عن الحب

***********

(( وعد ))

--------

وداير بهاتى وما فيش حدّ سامع

كإنى بنادى ف حديد الصوامع

وداير بهاتى ونويت انى أصلى

وأسلط عليهم حصير الجوامع

************

(( أراجوز ))

---------

اضحك لهم واعمل لهم أراجوز

واصنع لهم من سحنتك بزبوز

واضحك عليهم مرّة واعمل كوز

يمكن يحنّو عليك ويدّولك

ويعلّمولك ع الورق وتفوز

*****************

(( آمين ))

---------

كإن الودان والقلوب من عجين

كإن اللى صمم كراسى السياسة

–الكلام المبين – مصمم معاها

عشان اللى يقعد وياخد قراره

ونكتب آمين ** يدوبك يصدّق

*************

(( مش عارف ))

-------

سألتك بحبك

سألتينى ليه ؟

وهيفيد سؤالى وسؤالك بإيه ؟

**************