عــــوّاد
ما تصدقنيش
أنا مش درويش
بيحب الناى والضلّيله
ولا مارد ماسك كيله
وداير أكيّل همّ الناس
ولا حارس واقف
يحرس راس سيدنا الوالى
ولا كلب بينبح من غير صوت
جوّا بلاط الباب العالى
ولا نفسى أهتف تحت رايات الوطن الغالى
بأيتها كلام
ولا عايز أقول لك كنت إزاى
وأنا قاعد أتابع ع الشاشه
استشهاد صدّام
وعيون مفتوحه وخلق نيام
والعالم داير ينزف سم
وأنا ماشى معايا يدوب
الستر
وحبّة دم
ودعوة أم
وكلمه ف كُمّ قميص دبَلان
ما تصدقنيش
لو حسيتى إن أنا مش سلطان
لو قلبك حس
إن أنا دبلان زى الصفصاف
لو قلبك حس
إن أنا خوّاف … ما تصدقنيش
وما ترسمنيش على قلبك تانى وتتباهى
وما تسرقنيش من توّاهى ف أرض النسيان
و ما تنخدعيش
فى كلامى المبدور فى الجورنان وتعاتبينى
أنا عمرى ما كنت
علم مفرود على جتّة طفل فلسطينى
ولا كنت المنديل المليان
بدموع الفرح الحطّينى
ولا كنت السحبة اللى هتحذق
وتفضّى الفرح الياسمينى على حدود بغداد
ما تصدقنيش
لو كل ولاد الحاره اتلمّوا
وهتفوا بروح وبدن عوّاد
عوّاد باع أرضه وسابها وهجّ
والكل احتجّ
والكون اترجّ عشان عوّاد
دلوقت عباد بتبيع ف بلاد
وبلاد عمّاله تبيع ف عباد
وأنا عايز أقف لك ساعه حداد زى الساده
ما أنتى الحبّاله الولاده
وإنتى الأفلام المتعاده
وإنتى اللى بتدّينى العاده ف أيام رمضان
وأنا عامل روميو
وواقف أغنى لك بالليل تحت الشباك
زى الجدعان الحبّيبه
وإنتى بتحدفى للعالم ورد
وبتحدفى للمجاذيب أمثالى ف قراطيس خيبه
رغم إنى عامل لك
هيبه وشنّه ف وسط الناس
وعامل لك فاس
ومفكر نفسى إن أبو نوّاس
وإن إنتى أساس " لمُضر ونزار "
وعامل لك وسط قبايل قلبى
وليمه وزار
عاملانى هزار
رغم إنى رسمتك فوق ضلعينى وطن وديار
راسمانى تحف
وسخف
ومزار للناس الدون
ما تصدقنيش
لو قلت إن أنا واحد مجنون أو برّاوى
لو قلت إن أنا واحد غاوى
لو قلت مخاوى بنات الجن
لو قلت إن أنا مش عايز أحنّ لتفاصيلك
فى ساعات الخوف
وكلاب وغفر سيدنا الحلّوف
دايرة تكاكى
وأنا لسه بعافر وياكى
وبحاول ألمّ معاكى الضىّ ف عب الروح
وبحاول أهد حدود البوح
وبحاول أعد جروح الصمت القتّاله
وبحاول أطلّع من سيّالة قلبى النور
وبحاول أعدّى حيطان السور
الفاصل بين قلبى وبينك
أنا عايز أهجّ ف أرض الله
وأتمرّد على ريحة طينك
وأفرط لك سبحة ياسمينك فدادين أوجاع
وأكتم أحلامى ف قلب الدار
وأعمل بيّاع
وأرمح فى مشاع الأرض البور من غير مينه
من غير ما اتحطّ ف إيد نخّاس ابن لذينه
من غير ما أركب على صدر سفينه
بتفرط آخر دمعة موت
من غير ما استقبل صوت عوّاد
ملفوف فى تابوت
من غير ما أرسم على ورق التوت حرفين ونهار
من غير ما أهتف لك فى الميادين
زى الثوّار
إن إنتى الجنّة الفاتحه هناك
وإن إحنا النار
وإن إنتى شعار القمح المفرود ع اللسطاح
وإن إنتى
آمون
وحسن
وصباح
وإنك أفراح الخيّاله
وإن إنتى الخاله القاعده تعدّ حصاوى الدار
وبتضحك ساعة القيّاله
وإن إنتى عدالة الله النازله من السموات
ما تصدقنيش
لو قلت الأرض أما بتحدف
بتحط بنات
وما تسمعنيش
لو قلت ف ودنك
من غير صوت
عوّادك مات
تعليقات